ఓటీటీ లకూ సెన్సార్ అవసరం లేదా?

నిన్నా మొన్నటి వరకూ కేబుల్ టీవీ లో వచ్చే ప్రోగ్రామ్స్, సీరియల్స్ మాత్రమే తెలిసిన తరం ఉండేది. కానీ ఇప్పుడు ఆ వాతావరణం పూర్తిగా మారిపోయింది. ట్రెండ్‌కి తగ్గట్టే ఇప్పుడు తెలుగులో కూడా ఈ వెబ్ సిరీస్ హవా మొదలైంది. ప్రపంచవ్యాప్తంగా గత కొన్నేళ్లలో సినీ ప్రేక్షకుల అభిరుచి మారుతూ వస్తోంది. సినిమాల్నే పట్టుకుని వేలాడకుండా వెబ్ సిరీస్‌లనూ ఆదరిస్తున్నారు. వీటికి ప్రత్యేకంగా అభిమానులున్నారు. ఇండియాలో కూడా ఈ ట్రెండ్  పెరుగుతోంది. హిందీలో వెబ్ సిరీస్‌లకు మంచి గిరాకీ ఉంటోంది. వెబ్ సిరీస్ సినిమాకంటే ఏమాత్రం తక్కువకాదు. ఇక్కడ రెమ్యునరేషన్స్, మార్కెట్ కూడా భారీగానే ఉంటోంది. తెలుగులో ఇప్పటికే చెప్పుకోదగ్గ క్వాంటిటీ లోనే వెబ్ సిరీస్‌లు వచ్చాయి. మిగతా భాషల్లోవచ్చినవి కూడా తెలుగు వెర్షన్‌లోనూ స్ట్రీమింగ్ అవుతున్నాయి.

వెబ్ సిరీస్ ఒక ఫ్యాషన్. …

  సినిమా ఎక్స్పీరియన్స్ థియేటర్ మాత్రమే ఇవ్వగలదు అని చెబుతున్నా…. ఆ ఎక్స్ పీరియన్స్ కోసమే థియేటర్ కి వచ్చేవాళ్లు మాత్రం తక్కువలోనే ఉంటారన్నది నమ్మాల్సిన నిజమే. నలుగురు మనుషులు ఉన్న ఒక ఫ్యామిలీ సినిమాకి వెళ్లాలంటే కనీసం 1000-2000 రూపాయలు ఖర్చు అవుతుంది. కానీ అదే ధరకి మూడు నెలల ఇంటర్నెట్ డాటా వస్తుంది. అదే నెలలో ఇంకోకసినిమా అనుకుంటే ఆ డబ్బులకి రెండు ఓటీటీ సబ్ స్క్రిప్షన్స్ సంవత్సరం మొత్తం వస్తాయి. అన్‌లిమిటెడ్ ఎంటర్ టైన్మెంట్ తో పాటు ఇదే సినిమా మహా అయితే ఒక నెలరోజుల్లో ఇంట్లోనే చూసుకోవచ్చు. ఎన్నిసార్లు కావాలంటే అన్నిసార్లు చూడొచ్చు. అందుకే ఇప్పుడు యూత్ అంతా ఓటీటీల మీద పడ్డారు. సోషల్ మీడియాలో వెబ్ సిరీస్ ల మీద, ఫారిన్ సినిమాల మీదా చర్చ ఒక ఫ్యాషన్.

    జర్నీలో ఉన్నా, ఆఫీస్ లో ఉన్నా లాప్ టాప్, స్మార్ట్ ఫోన్ ఉంటే చాలు మిస్ కాకుండా ఫాలో అవ్వొచ్చు. వెంటనే దాని గురించిన డిస్కషన్ చెయ్యొచ్చు. కొత్త ఐడియాలకి ఇన్స్పిరేషన్ పొందొచ్చు. ఇవన్నీ ఓటీటీ వల్ల అడ్వాంతేజెస్. అందుకే ఇంకో అయిద్దేళ్లలో. టీవీ, థియేటర్స్ కీ ఓటీటీ మంచి ఆల్టర్ నేటివ్ అవుతుందని మార్కెట్ కనిపెట్టింది. ఇప్పూడు అందరి దారులూ ఓటీటీల వైపే, అందరి దృష్టీ వెబ్ సిరీస్ ల మీదే….   

ఓటీటీ లకూ సెన్సార్ అవసరం లేదా?

వెబ్ సిరీస్‍లు సినిమాటోగ్రఫీ చట్టం 1952 లేదా కేబుల్ టెలివిజన్ నియంత్రణ చట్టం 1995 పరిధిలోకి రావు. ఇక వీటి మీద ఎంటర్‌టైన్‌మెంట్ టాక్స్, జీ.ఎస్.టీ కూడా లేకపోవటంతో. కంటెంట్‌లో విచ్చలవిడిగా న్యూడ్, బూతులు ఉండే భాష, డ్రగ్స్ తీసుకోవటం లాంటి సీన్స్, క్రైం వరల్డ్‌లో జరిగే విపరీతమైన హింస నేరుగా సొసైటీలోకి వచ్చేస్తున్నాయన్నది ఒక విమర్శ. సినిమాకంటే ఎక్కువ సేపు కథ చెప్పే అవకాశం ఉండటం, తక్కువ “క్రూ”తో షూటింగ్ చేసే వీలుండటం,  రిలీజ్ కోసం పెద్దగా కష్టపడే అవకాశం లేకపోవటంతో పాటు. సినిమాల్లొ కనిపించే నెపోటిజం, స్టార్ అట్రాక్షన్ పేరుతో కొద్దిమంది చేతుల్లోనే సినిమా ఉండిపోవటం లాంటివి కూడా లేకపోవటంతో.., కొత్తగా వచ్చే డైరెక్టర్స్‌కీ, యాక్టర్స్‌కి  ఇక్కడ మంచి అవకాశాలున్నాయి.

ఓటీటీ

సినిమాగా హిట్ అవదూ అనుకున్న సబ్‌జెక్ట్ కూడా వెబ్ సిరీస్‌గా మారి మంచి మార్కులు వేయించుకున్న సంధర్భాలు చాలా ఉన్నాయి. అంతే కాదు ఒక సిరీస్‌లో ఏపిసోడ్స్ మంచి రేటింగ్స్ రాబడితే…. తర్వాత ఎన్ని పార్టులైనా తీసే అవకాశం ఎటూ ఉంది కదా. అందుకే ఇప్పుడు ఓటీటీ ఫ్లాట్ఫార్మ్స్ ఎక్కువగా వెబ్ సిరీస్‌ని జనం లోకి తెచ్చే పనిలో పడ్డాయి. వెబ్ సిరీస్ ఫాలో అవటం లేదూ అంటే నేను వెనుకబడి పోయానేమో అని ప్రేక్షకుడే రిగ్రెట్ అయ్యేంతగా ప్రచారంజరుగుతోంది.

   మనీ హెయిస్ట్, డార్క్, లూసిఫర్ లాంటి ఫారిన్ వెబ్ సిరీస్ లతో పాటు పాతాళ్ లోక్, మీర్జాపూర్, డెల్లీ క్రైమ్ లాంటి ఇండియన్ వెర్షన్స్ కూడా ఇప్పుడు ఎంటర్ టైన్ మెంట్ జోన్‌ని ఆక్రమించేస్తున్నయ్. జీబీల కొద్దీ డాటా, ఓటీటీ సబ్ స్క్రిప్షన్స్, స్మార్ట్ ఫోన్ స్ట్రీమింగ్ తో ఇప్పుడు వరల్డ్ మొత్తాన్ని ఒక మానియలాగా ఓటీటీ చుట్టు ముట్టింది. ఇప్పటి వరకూ చూడని కొత్త కాన్సెప్ట్స్, ఇంతకు ముందు పక్కన పెట్టిన భాష, ఫ్రేమ్‌లో, ప్రెజెంటేషన్‌లో, స్క్రీన్‌ప్లే లో అన్నీ కొత్తగా ఉంటున్నాయి.

సినిమాటోగ్రఫీ చట్టం…

ఎప్పుడైనా సరే.. ఒక జనరేషన్ తర్వాత ప్రతీ దానిలోనూ మార్పు వచ్చినట్టే ఇప్పుడు ఎంటర్ టైన్ మెంట్ లోనూ మార్పు వచ్చింది. సినిమా, టీవీలకి ఆల్టర్ నెటివ్ గా ఇప్పుడు ఇంటర్నెట్ స్ట్రీమింగ్ వచ్చింది. కానీ…. ఇక్కడా సమస్యలున్నాయి. ఈ వెబ్ సిరీస్‍లు సినిమాటోగ్రఫీ చట్టం 1952 లేదా కేబుల్ టెలివిజన్ నియంత్రణ చట్టం 1995 పరిధిలోకి రావు. అంటే మన సెన్సార్ రూల్స్ ఈ కంటెంట్ మీద పని చెయ్యవు. ఇక వీటి మీద ఎంటర్ టైన్ మెంట్ టాక్స్, జీ.ఎస్.టీ కూడా లేకపోవటంతో. దీనివల్ల కంటెంట్ లో విచ్చలవిడిగా న్యూడ్, బూతులు ఉండే భాషా, డ్రగ్స్ తీసుకోవటం లాంటి సీనులు, క్రైం వరల్డ్ లో జరిగే విపరీతమైన హింస నేరుగా సొసైటీలోకి వచ్చేస్తున్నాయన్నది ఒక విమర్శ నిజానికి ఇండియన్ వెర్షన్ గా వచ్చిన మీర్జాపూర్, రాస్ భరీ, మనీ హెయిస్ట్ తెలుగు వెర్షన్ లాంటి వెబ్ సిరీసెస్‌లలో వాడిన భాష చాలా అభ్యంతర కరంగా ఉంది. ఇక హింస, సెక్సువల్ అబ్యూజింగ్ కంటెంట్ అయితే చెప్పే పని లేదు.  వీటి మీద కంట్రోల్ లేకపోతే ఇవి కొత్త జనరేషన్ మీద నెగెటివ్ ప్రభావం చూపించే అవకాశం ఉందని చాలామంది ఒపీనియన్. ఒక డ్రగ్ ఎడిక్ట్ ఎలా ఇంజక్షన్ చేసుకోవాలి, గన్ ఎలా యూజ్ చేయాలి అనే విషయాలని అవసరమైన దానికంటే ఎక్కువ వివరంగా చూపించటం, మనుషులని ఈజీగా చంపేయటం లాంటి సీన్లు కోకొల్లలుగా ఉన్న వెబ్ సిరీస్ లే ఎక్కువగా ఉన్నాయి. ఇవన్నీ నేరుగా మన ఇంట్లోకి వచ్చేస్తున్నాయి. చిన్నపిల్లలూ, టీనేజర్లూ వీటిని ఈజీగా కనెక్ట్ అవుతారు అన్నది సైకాలజిస్టుల మాట. మీర్జాపూర్ అనే వెబ్ సిరీస్ లో మనం మామూలుగా వాడటం మానేస్తున్న బూతులని విపరీతంగా వాడారు. తెలుగులోకి డబ్ చేసినప్పుడు ఆజ్ ఇట్ ఈజ్‌గా అవే పదాలని తెలుగులోనూ వాడారు.

తెలుగులోనూ వెబ్ సిరీస్ ల హవా

ఇప్పుడు తెలుగులోనూ వెబ్ సిరీస్‌ల హవా మొదలైంది. ఓటీటీలకంటే ముందే యూట్యుబ్ లో స్టోరీ డిస్కషన్, నిరుద్యోగ నటులు లాంటి వెబ్ సిరీస్ లు వచ్చాయి. రెగ్యులర్ ఫార్మాట్ ని బద్దలు కొట్టిన కొత్త రకం ఫ్రేమింగ్, ప్రజెంటేషన్ తో ఆకట్టుకోగలిగాయి.  మెగా ఫ్యామిలీ డాటర్ నిహారిక కూడా వెబ్ సిరీస్ ప్రయత్నం చేసి కొంతవరకూ జనాలని ఆకట్టుకోగలిగింది. కానీ, ఇవి మరీ రొటీన్ సీరియల్ కంటే పెద్దగా ఏమీ లేవన్న విమర్షలు కూడా వచ్చాయి. ఇప్పుడు జీ5, అమేజాన్ లాంటి ఓటీటీలు తెలుగు కంటెంట్ మీద ఎక్కువ ఇంట్రస్ట్ చూపిస్తూ ఉండటంతో. మనదగ్గర కూడా వందల్లో వెబ్ సిరీస్ లు తయారవుతున్నాయి .

పోటీ ఎక్కువ అయితే

రోజురోజుకూ టెక్నాలజీ పెరుగుతుండటంతో వెబ్ స్ట్రీమింగ్ కి మార్కెట్ పెరుగుతోంది. దీంతో ఓటీటీలలో వెబ్ సిరీస్‌ల హవా ఎక్కువవుతోంది. ప్రేక్షకులు కూడా ఈ కంటెంట్ కోసం ఎగబడుతూండటంతో ఈ తరం దర్శకనిర్మాతలు కూడా వెబ్ సిరీస్‌మీద ఎక్కువ ఇంట్రస్ట్ చూపిస్తున్నారు. అయితే కొంత భాష విషయంలో మనవాళ్లు జాగ్రత్తగానే ఉన్నారు. ఒక పల్లెటూరి క్యారెక్టర్ మాట్లాడుతున్నప్పుడు మోటు సామెతలూ, కొన్ని బూతులూ రావటం మామూలుగానే ఉంటుంది. ఇది ఆ పర్టిక్యులర్ ఏరియా, యాసలని ప్రొజెక్ట్ చేస్తుంది. ఆ భాషని పాలిష్ చేసేస్తే అక్కడ ఉండాల్సిన ఎస్సెన్స్ పోతుంది. కాబట్టి అంతవరకూ మాత్రమే ఆ భాషని వాడుతున్నారు. అదీ మరీ లిమిట్స్ దాటకుండా ఇప్పటికి కొంత జాగ్రత్తలైతే తీసుకుంటున్నారు కానీ ఇక్కడ కూడా పోటీ ఎక్కువ అయితే ప్రేక్షకులని అట్రాక్ట్ చేయటానికి ఆ భాషనీ, అబ్జెక్షనబుల్ కంటెంట్ ని కూడా యాడ్ చేసే అవకాశం ఉంది. 

భ్రమలో ఉంచటం కూడా తప్పే

పిల్లలదగ్గర కూడా ఇప్పుడు స్మార్ట్ ఫోన్, డానికి ఇంటర్నెట్ మామూలైపోయింది. దాన్ని ఎలా వాడాలి అన్నది చెప్పాల్సింది పేరెంట్సే. వెబ్ సిరీస్ కంటెంట్ అభ్యంతరకరంగా ఉంటోంది అనుకుంటే. అంతకు మించిన పోర్న్, అడల్ట్ కంటెంట్, సాహిత్యం అన్నీ వెబ్ లో ఎప్పటి నుంచో ఉన్నాయి. వాటినుంచి దూరంగా ఉంచుతున్నాం కదా, ఇక్కడా అలాంటి జాగ్రత్తే తీసుకోవాలి. సొసైటీని ఓపెన్ గా రిఫ్లెక్ట్ చేసే కంటెంట్ ని ఆపాలనుకోవటం మూవీమేకర్ ఫ్రీడం ని ఆపినట్టే. డార్క్ సైడ్ ఆఫ్ సొసైటీ గురించి చెప్పకుండా. “అంతా బాగానే ఉంది” అని భ్రమలో ఉంచటం కూడా తప్పే అవుతుంది. కావాలని బూతులని వాడటం అక్కడక్కడా ఉంది. ప్రతీ విషయం లోనూ ఇది మంచిదీ ఇది కాదూ అని నిర్ణయించుకున్నట్టే ఇక్కడా చేయాలి. 

                               స్వరూప్ తోటాడ (మూవీ అనలిస్ట్)

ఎలా ఆపగలం?

వెబ్ కంటెంట్ కి సెన్సార్ అనేది అంత ఈజీగా అయ్యేది కాదు. వెబ్ సినిమా వరకూ ఓకే కానీ. కొన్ని గంటల నిడివి ఉండే వెబ్ సిరీస్ లు, వీడియో కంటెంట్ వందలకొద్దీ వస్తున్నాయి. అంటే ఒక వెబ్ సిరీస్ ని చూడాలంటే మామూలుగానే మనకి 5-6 గంటలు పడుతుంది. ఇక సెన్సార్ కోసం చూడాలి అంటే ఎంతమంది పని చెయ్యగలరు? ఇక మన వరకూ అనుకున్నా వరల్డ్ వైడ్ గా వచ్చే కంటెంట్ ని ఎలా ఆపగలం? పోర్న్ అంటే దాన్ని మనవరకూ రాకుండా ఆ వెబ్ సైట్ ని నిషేదించవచ్చు. కానీ ఓటీటీలో వచ్చే ప్రతీ కంటెంట్ నీ చూడటం కష్టం. ఇక్కడ ఏది చూడాలి ఏది చూడకూడదూ అనే విషయం లో ఓటీటీలు ముందే క్లారిటీ ఇస్తున్నాయి. అడల్ట్ కంటెంట్ ఉన్నా, హింస ఎక్కువైనా ముందే పిల్లలకోసం కాదు అని డిస్క్లైమర్ వేస్తున్నారు. అంటే మనం చూడాలా వద్దా అన్నది మనకే వదిలేస్తున్నారు.

 ఇక భాష విషయం లోనూ… కావాలని బూతులని ఇరికించటం వేరు, ఒక మనిషి మాట్లాడే భాషలో భాగంగా ఆక్సెప్ట్ చేయటం వేరు. నిజానికి మోడరన్ లైఫ్ రిలేషన్స్ మీద ఇంకా బోల్డ్ కంటెంట్ రావాల్సిన అవసరం ఉంది. ఎక్కువమందిని అట్రాక్ట్ చేసేవి హర్రర్, లేదంటే అడల్ట్ కంటెంట్ వీటికి పర్టిక్యులర్ సీజన్ అంటూ ఉండదు. ఎప్పుదైనా బిజినెస్ ని తీసుకురాగలవు. ఒక్క తెలుగు అని కాదుదు, వరల్డ్ మొత్తం ఇదే జరిగుతోంది. సినిమాటిక్ అడల్ట్ కంటెంట్ ఎంతవరకూ పర్మిజబుల్ అనేది మూవీ మేకర్, ఓటీటీ రూల్స్ మాత్రమే నిర్ణయిస్తాయి.

                                    శశి (మూవీ, వెబ్ కంటెంట్ మేకర్)

పిల్లల మీద ప్రభావం పడుతోంది

    సినిమాలు ప్రభావం చూపించటం అంటే మొత్తంగా క్యారెక్టర్ ని మార్చెయ్యలేవు. కానీ… కొన్ని విషయాలని తీవ్రంగా ప్రభావితం చేస్తాయి. ప్రీమారిటల్ సెక్స్ గురించి చెప్పిన సినిమా సేఫ్ సెక్స్ గురించి చెప్పదు. ఫ్రీ లైఫ్ గురించిన కంటెంట్ చెబుతున్నప్పుడు దానివల్ల సోషల్ లైఫ్ ఎలా డిస్టర్బ్ అవుతున్నది చెప్పదు. ఒక రకమైన భాషని, బాడీ షేమింగ్ లాంటి సీన్లనీ చూసిన పిల్లలు  పక్కవాళ్ళని మానసికంగా బాధపెడుతున్నాం అనే విషయం వాళ్లకి తెలియకుండానే ఆ భాషని వాడేస్తారు. మొత్తంగా సెన్సార్ చేయటం కుదరనప్పుడు. మూవీ మేకర్స్ కొన్ని లిమిట్స్ పాటించటంలో తప్పేమీ లేదు. రియాలిటీకీ, నాచురాలిటీకీ మధ్య ఉండే తేడా చెప్పగలిగినప్పుడు దేనికీ సెన్సార్ అవసరం లేదు కానీ. మీరు చూస్తున్నారు కాబట్టి మేం చూపిస్తున్నాం అనటం ఎలా కరెక్ట్. మీరు చంపాలనుకుంటున్నారు కాబట్టే మేము ఆయుధాలు సప్లై చేస్తున్నాం అన్నట్టే ఉంటుంది.

         రమాదేవి (సోషల్ యాక్టివిస్ట్, చైతన్య మహిళా సంఘం)